Lög Endó­samtakanna

1. GR. HEITI

Heiti samtakanna er Endósamtökin. Á ensku heita samtökin The Endometriosis Association of Iceland.

2. GR. MARKMIÐ

Meginmarkmið Endósamtakanna er að veita fólki með endómetríósu og aðstandendum þess stuðning og fræðslu.

Önnur markmið:

• Fræða félagsmenn, almenning, heilbrigðisstarfsfólk og heilbrigðisyfirvöld um endómetríósu.
• Efla tengsl milli fólks með endómetríósu og heilbrigðisstarfsfólks/yfirvalda.
• Stuðla að bættri þjónustu við fólk með endómetríósu og almennt vinna að bættum hag þess.

3. GR. STARFSEMI

Starfsemi Endósamtakanna er þríþætt:

1. Ýmis þjónusta og stuðningur við félagsmenn samtakanna um allt land.
2. Fræðsla um endómetríósu.
3. Vinna að langtímamarkmiðum samtakanna. Starfa með öðrum félagasamtökum hér á landi sem erlendis, að sameiginlegum markmiðum og starfa með heilbrigðisstarfsfólki og yfirvöldum að umbótum í þágu fólks með endómetríósu.

4. GR. AÐILDARFÉLAGAR

Endósamtökin eru öllum opin en eru fyrst og fremst ætluð fólki með endómetríósu og aðstandendum þess. Félagar geta verið:

1. Ársfélagar, þeir, sem greiða árlegt félagsgjald.
2. Heiðursfélagar, þeir, sem kjörnir eru á aðalfundi eftir tillögum stjórnarinnar.

5. GR. FÉLAGSGJÖLD OG REKSTUR

Endósamtökin eru ekki rekin í hagnaðarskyni. Samtökin eru sjálfstæð samtök rekin með árgjaldi félagsmanna, styrkjum og frjálsum framlögum ásamt ágóða af söluvarningi.

Stjórn ber sameiginlega ábyrgð á rekstri félagsins og veitir prókúru fyrir samtökin. Ráðstöfun fjármagns skal nýtast í daglegan rekstur og til að ná markmiðum samtakanna.

Stjórn ákvarðar breytingar á árgjaldi. Reikningar skulu sendir félagsmönnum eigi síðar en 31. janúar ár hvert. Sé árgjaldið ekki greitt innan sex mánaða frá gjalddaga, fellur félagsaðild sjálfkrafa niður.

Þeir sem gerast félagsmenn fyrir 1. september skulu greiða fullt árgjald. Þeir sem gerast félagsmenn eftir þann tíma greiða hálft árgjald það árið. Heiðursfélagar greiða ekki félagsgjöld.

Ferðir, ráðstefnur og önnur stærri verkefni sem ekki eru í fjárhagsáætlun samtakanna skulu ávallt vera samþykkt af stjórn samtakanna.

6. GR. REIKNINGAR

Reikningstímabil samtakanna er almanaksárið. Reikningar samtakanna skulu endurskoðast af tveimur skoðunarmönnum reikninga sem tilnefndir eru af stjórn. Endurskoðaða reikninga samtakanna skal leggja fyrir aðalfund til samþykktar.

Stjórn samtakanna ber ábyrgð á því að bókhald samtakanna sé unnið í samræmi við lög og reglur um bókhald almannaheillafélaga. Skoðunarmenn reikninga eru samþykktir árlega á aðalfundi og sitja í eitt ár í senn. Skoðunarmennirnir eru hlutlausir aðilar sem eru ekki tengdir samtökunum og hafa þekkingu á bókhaldi. 

7. GR. STJÓRN

Aðalstjórn samtakanna samanstendur af fimm félagsmönnum sem kosnir eru til tveggja ára í senn á aðalfundi samtakanna. Á ári sem endar á sléttri tölu skal kjósa inn 3 aðalmenn og á oddatöluári skal kjósa inn 2 aðalmenn. Stjórn skiptir með sér verkum á fyrsta fundi eftir aðalfund. Firmaritun er í höndum meirihluta stjórnar.

Meðlimir í aðalstjórn, þar með talinn formaður,  skulu ekki sitja lengur en 6 ár í sama embætti, nema enginn annar gefi kost á sér í embættið. Hafi einstaklingur verið kosinn á miðju tímabili getur hann klárað það auk þriggja heilla tímabila, þ.e. alls að hámarki sjö ár.

Framboð til aðalstjórnar þurfa að berast félaginu með tölvupósti tveimur vikum fyrir aðalfund.

Einungis lögráða félagar skuldlausir við samtökin geta gefið kost á sér. Meirihluti stjórnarmanna skal vera fólk með endómetríósu. Varðandi framboð til stjórnar, sjá 8. gr. laga um aðalfund.

Stjórn setur starfs- og siðareglur um starfsemi á vegum félagsins og tilnefnir nefndir og ráð til að sinna tilteknum verkefnum, þegar það á við. Stjórn er sameiginlega ábyrg fyrir öllum fjármálum samtakanna.

Ef meðlimur stjórnar hættir á miðju tímabili skal kalla til meðlim varastjórnar í samræmi við starfsreglur stjórnar og skal sá aðili sitja fram að næsta aðalfundi. Hætti formaður á miðju tímabili skal varaformaður taka við skyldum formanns og kalla skal til meðlim varastjórnar til setu í aðalstjórn.

Varastjórn
Varastjórn skal samanstanda af að lágmarki tveimur einstaklingum. Framboð til varastjórnar skal berast í tölvupósti tveimur vikum fyrir aðalfund. 

Ef meðlimur í aðalstjórn lætur af embætti á miðju tímabili skal einstaklingur í varastjórn taka sæti fram að næsta aðalfundi, í samræmi við starfsreglur stjórnar. 

Varastjórn skal samþykkt á aðalfundi. Stjórn getur samþykkt einstakling inn í varastjórn á miðju tímabili með meirihluta atkvæða á stjórnarfundi og gildir það fram að næsta aðalfundi. 

Varastjórnarmeðlimir starfa í samræmi við starfs- og siðareglur og undirrita þær á fyrsta fundi eftir aðalfund.

8. GR. AÐALFUNDUR

Aðalfund samtakanna skal halda eigi síðar en 1. maí ár hvert. Dagsetning og staðsetning fundarins ákvarðast af stjórn.

Fundarboð aðalfundar skal sendast skriflega (í tölvupósti) til félagsmanna og birta á samfélagsmiðlum samtakanna eigi síðar en tveimur vikum fyrir áætlaða dagsetningu aðalfundar.

Aðalfundurinn er æðsta ákvörðunarvald samtakanna og getur, ef ekki er annars getið, með meirihluta atkvæða atkvæðabærra fundarmanna tekið allar þær ákvarðanir sem fyrir fundinum liggja. Félagsmenn samtakanna teljast atkvæðabærir fundarmenn. Á aðalfundi ræður einfaldur meirihluti atkvæða. Kosið skal skriflega sé þess óskað og skal tryggja að ekki sé hægt að rekja atkvæði til einstakra fundarmanna. Þá getur fundarmaður lagt fram tillögu sem borin er undir fundinn og þarf 2/3 atkvæða atkvæðabærra fundarmanna til að tillagan fáist samþykkt.

Varðandi breytingatillögur á lögum samtakanna sjá gr. 10 um breytingar á lögum.

Dagskrá aðalfundar skal vera eftirfarandi:

• Val á fundarstjóra, fundarritara og atkvæðateljara.
• Skýrsla stjórnar. (Einnig skýrslur nefnda og starfshópa eftir því sem við á).
• Samþykkt reikninga samtakanna.
• Lagabreytingar. (Eftir því sem við á).
• Stjórnarkjör.
• Önnur mál.

9. GR. AUKAAÐALFUNDUR

Til aukaaðalfundar skal boða ef stjórn samtakanna þykir ástæða til eða þegar a.m.k. tíundi hluti félagsmenn á óska þess. Beiðni um aukaaðalfund skal berast stjórn skriflega og fyrirhuguð dagskrá fundarins fylgja með. Fundurinn skal haldinn eigi síðar en tveimur mánuðum eftir að krafa um það var fram sett. Til aukaaðalfundar skal boða með sama hætti og til aðalfundar. Aukaaðalfundur telst löglegur sé löglega til hans boðað. Á aukaaðalfundi skulu aðeins rædd og tekin til afgreiðslu þau mál sem fram koma í fundarboði.

10. GR. BREYTINGAR Á LÖGUM

Tillögur stjórnar til breytinga á lögum skulu kynntar félagsmönnum í aðalfundarboði eigi síðar en tveimur vikum fyrir boðaða dagsetningu aðalfundar. Tillögu félagsmanns til lagabreytinga má aðeins taka til afgreiðslu á aðalfundi, að hún hafi borist stjórn a.m.k. fjórum vikum fyrir aðalfund og verið kynnt félagsmönnum í fundarboði.

Breyting á lögum öðlast gildi ef 2/3 atkvæðabærra fundarmanna veita breytingatillögunni atkvæði sitt.

11. GR. FÉLAGSSLIT

Ákvörðun um slit samtakanna skal tekin á stjórnarfundi með einföldum meirihluta og renna hugsanlegar eignir og lausafé til góðgerðamála sem tengjast málefnum fólks með endómetríósu og/eða ófrjósemi þess.

Þannig samþykkt á aukaaðalfundi Endósamtakanna þann 1. apríl 2025.