Er ég með endómetríósu?

Þjáist þú af slæmum tíðaverkjum, miklum blæðingum, meltingarvandamálum eða sársauka við kynlíf eða glímir þú við ófrjósemi?
Ef svo er þá gætir þú verið með endómetríósu.

Hver eru einkennin?

Þú getur verið með endómetríósu án þess að hafa nokkur einkenni sjúkdómsins en langflestir glíma við eitt eða fleira af eftirfarandi:

Mjög sársaukafullar blæðingar
- Þú mætir ekki í vinnu eða skóla og/eða
- Þú verður að taka inn sterk verkjalyf
Verkir í kviðarholi milli blæðinga
Óreglulegar blæðingar
Sársauki við eða eftir samfarir
Sársauki við þvaglát eða hægðir
Erfiðleikar við að verða barnshafandi
Síþreyta

Hvað á ég að gera ef ég held að ég sé með endó?

Leitaðu strax til heimilislæknis eða kvensjúkdómalæknis og lýstu fyrir honum hvað er að hrjá þig. Við höfum útbúið lista sem gæti hjálpað þér við að fá rétta meðhöndlum. Prentaðu listann, fylltu hann út og taktu hann með þegar þú hittir lækninn. Óskaðu svo eftir því hjá þínum lækni að fá tilvísun til teymisins. Það hefur ekki fundist nein lækning við endómetríósu en það eru til margar leiðir til að meðhöndla sjúkdóminn. Mikilvægt er að hann greinist sem fyrst svo hægt sé að takast betur á við afleiðingar hans. Þú skalt því ekki bíða með læknisheimsókn ef þig grunar að þú sért með endó.

Hvað svo?

Leiki grunur á því að þú sért með endómetríósu er líklegt að fram fari kviðarholsspeglun til að staðfesta sjúkdómsgreininguna. Best er að fara í speglun hjá Endóteyminu. Kviðarholsspeglun er áhættulítil aðgerð og jafnframt eina örugga leiðin til að greina endómetríósu. Venjulega er hægt að greina sjúkdóminn og fjarlægja afbrigðilegan vef úr kviðarholinu í sömu aðgerðinni. Ef engin endómetríósa er sjáanleg eru sýni send til rannsóknar til staðfestingar. Stundum er endómetriósan ósýnileg og því sýnatakan nauðsynleg.

Við getum hjálpað þér

Samtök um endómetríósu leitast við að aðstoða þá sem glíma við sjúkdóminn með því að veita stuðning og fræðslu. Á síðunni okkar má finna margvíslegar upplýsingar um endómetríósu ásamt því sem reynslusögur fólks með endó geta veitt innsýn í hvernig lífið með sjúkdómnum er. Þeir sem ganga í samtökin fá síðan aðgang að lokuðum hóp á facebook þar sem einstaklingar með endó leita eftir stuðningi, skiptast á upplýsingum og deila reynslu sinni.