Aðalfundur Endósamtakanna fer fram á morgun, miðvikudaginn 8. apríl kl. 17:30. Þrjú sæti eru laus í aðalstjórn og hafa borist fjögur framboð. Hér kemur kynning á þeim framboðum sem borist hafa.

Emma Rivard Henriot

Ég heiti Emma og ég er 24 ára gömul. Ég greindist með endó með segulómskoðun í Frakklandi árið 2022, þegar ég var 21 árs. Ég man eftir einkennum allt frá því ég var 11 ára. Ég fór í mína fyrstu endó aðgerð í febrúar. Þó að oft hafi verið hlustað á mig, þurfti ég samt að lifa í 10 ár án þess að vita hvað var að gerast í líkamanum mínum.

Ég er doktorsnemi í heimspeki við Háskóla Íslands. Rannsóknir mínar er um ungt fólk með endó og ég er að reyna að skilja hversu mikið sjúkdómurinn (oft ógreindur á þessum árum) hefur áhrif á þau.

Ég var í varastjórn og gekk til liðs við aðalstjórnina í janúar.

Ég er mjög hrifin af fyrri störfum stjórnarinnar og mig langar að halda áfram að vinna með öllum að því að bæta vitund, skilning og réttindi fólks með endó. Ég gekk í stjórnina í janúar og vil halda áfram þar!

Þar sem doktorsnámið mitt snýst um endó get ég notað þekkinguna sem ég afla mér úr greinum og bókum daglega til að búa til fræðsluefni og nota gögn til að verja réttindi fólks með endó. Ég mun deila öllum niðurstöðum rannsókna minna með Endósamtökunum. 

Mér finnst að það sé mjög mikilvægt að vita hvað endó er. Halda áfram að fræða fólk: ungt fólk, en líka fjölskyldur þeirra og fyrirtæki ættu áfram að vera í forgangi, eins og stjórnin hefur gert.

En endó er dagleg barátta; greiningin gerir ekki öll einkennin að engu. Þess vegna er stuðningur og aðgengileg þekking um hvað hægt er að gera mér mjög mikilvæg.

Endó samfélagið er svo sterkt og saman getum við gert frábæra hluti! Reynsla okkar er svo mikilvæg til að auka vitund, þekkingu og stuðning!

Ísabella Ögn Þorsteinsdóttir

Ég heiti Ísabella Ögn og er 28 ára gömul. Ég stunda nám hjá NTV í Kerfisstjórnun og hef verið virk í starfi Endósamtakanna frá því árið 2024.

Mig langar að bjóða mig fram í stjórn samtakanna, því ég vil halda áfram að fræða og styðja fólk sem glímir við endómetríósu. Mér þykir mjög vænt um að geta komið að því að bæta aðstæður og veita stuðning við þá sem þurfa á því að halda.

Sigrún Erla Karlsdóttir

Ég heiti Sigrún Erla Karlsdóttir og býð mig fram til aðalstjórnar Endósamtakanna. Ég hef verið í varastjórn síðan 2018 og fylgt samtökunum í gegnum þróun sinnar til þess stórfenglega og sívaxandi samfélags sem þau eru í dag. Ég er stolt af því sem við höfum áorkað fram að þessu og vil nú taka virkari þátt í framtíð samtakanna.

Ég var greind með endómetríósu 30 ára eftir langt veikinda ferli frá því ég var barn. Eins og margir þekkja sjálfir þá tók það óheyrilega langan tíma að fá nafn á sjúkdóminn sem hefur svona marktækt áhrif á líf mitt. 17 ár af læknisheimsóknum og óvissu. Ég er öryrki í dag og brenn fyrir því að sagan endurtaki sig ekki.

Þið sem eruð fastagestir á viðburðunum okkar þekkið mig líklega, ég er mjög virk og hef unnið ýmis verk fyrir samtökin af hliðarlínunni. ❤️

Ég er óendanlega þakklát fyrir alla þá sem koma að samtökunum og óska þess að vinna áfram að hagsmunum okkar allra.

Valgerður Þ. Snæbjarnardóttir

Kæra endósamfélag!
Valgerður Þórdís Snæbjarnardóttir heiti ég og er 48 ára gömul kona með endómetríósu og var með adenómýósu líka. Ég er gift og á einn son sem nú er á fimmtánda ári. Ólst upp á sunnanverðum Vestfjörðum þar til ég flyt til Reykjavíkur og hef búið hér síðan en með tæplega 8 ára hléum þar sem ég hef búið í Noregi. Útskrifaðist sem iðjuþjálfi frá Háskólanum á Akureyri árið 2017 og hef eftir útskrift starfað sem iðjuþjálfi á Landspítalanum en er nú í launalausu leyfi þaðan þar sem ég er í endurhæfingu sem stendur.

Ég tel þekkingu mína á heilbrigðiskerfinu, bæði sem notanda og starfsmanns nýtist í starfi samtakanna og hef því ákveðið að gefa kost á mér í stjórn Endósamtakanna. Styrkleika mína vil ég nýta til að finna leiðir til að bæta þjónustu við okkur sem erum með endó og adenó.

Valfrelsi skiptir mig miklu máli og er það eitthvað sem ég mun vilja geta bætt. Bæði sé ég tækifæri í að efla þá þjónustu sem nú þegar er til staðar en held að með aukinni vitundavakningu að þá væri æskilegt að fleiri kvensjúkdómalæknar myndu sérhæfa sig í að meðhöndla einstaklinga með endómetríósu og adenómýósu. Þar sem ég hef góða þekkingu á norsku samfélagi að þá hef ég í gegnum árin fylgst með starfi Endósamtakanna í Noregi og þar sé ég tækifæri í að efla samstarfið á milli norðurlandanna til að bæta stöðu okkar í heilbrigðiskerfinu og á vinnumarkaði.

Endósamtökin hafa gefið mér mjög mikið síðasta árið, fyrst frá þátttöku minni í stuðningshópi og frá því að ég bauð mig fram í varastjórn samtakanna og svo síðar sem ritari í stjórn samtakanna. Þeirri vinnu langar mig að fá tækifæri til að halda áfram með.

Saman erum við sterkari!